كحيلان
ياشعرتبقى في نظرهم كحيلان
وبنظرتي تسوى عيال الحمايل
حنا اثنين اخوان واكثر من اخوان
لوماتجمعنا عروق وسلايل
لونختلف بأسماء وعروق وأوطان
يبقى التشابه بيننا بالخصايل
وانا ليا مني بغيت اكسب انسان
اسعى له بكل السبل والوسايل
أعرف كيف أرد الاحسان بإحسان
كيف أحصد بذور الفضايل فضايل
عايش زمان عاصرت به كل الازمان
مااعيل بس اكسر ثلاثين عايل
اكسب عدو واحرق به قلوب عدوان
اشعل فتيله بس اطفي فتايل
وان خفت ضعف اخاف من ضعف الايمان
وان عفت حمل اعاف حمل الجمايل
ماأظمأ على الساحل ولومت غرقان
لومركبي تابوت والموج هايل
تغرق شهيد أرحم من تموت عطشان
طيحة شموخ ولاوقوف امتمايل
ودك ليا من جيت في كل ميدان
لوماانت الاول..بالصفوف الاوايل
خلك لياعودت خسران ..خسران
ينقال عنك عامل لك عمايل
لاصرت تحلم احلم تكون سلطان
وان جيت تقنع اقنع بحلم زايل
الوقت غربه واخر الدرب عنوان
والعمر رحله والتجارب رحايل
وانا كثر مالي من الناس خلان
اللي صفوا لي بالشدايد قلايل
شايف حسد قل شايف اشكال وألوان
قابلت ظلم؟ إلا لقيت الهوايل
إن عشش بصدري من الغبن شيطان
وتسددت دوني جميع الوسايل
بلقى من عيال الحمايل كحيلان
اللي يكفي عن عيال الحمايل
